தமிழ்மொழியில் பொதிந்துள்ள அழகினை மிக எளிமையான பாணியில் அமெரிக்காவைச் சேர்ந்த தமிழ் புலமையுடைய ஒருவர் வியந்து பேசியுள்ளமை அனைவராலும் பெரிதும் பேசப்பட்டு வருகின்றது.
அமெரிக்காவை சேர்ந்த தாமஸ் ஹிட்டோஷி புரூக்ஸ்மா என்பவரே இவ்வாறு உலகப் பொதுமறையாகப் போற்றப்படும் திருக்குறளையும் தமிழ்மொழி சார்ந்த கருத்துகளையும் சிறப்பாக எடுத்துரைத்துள்ளார்.
திருக்குறளில் அழகு என்ற தலைப்பில் தேசிய நூலக வாரியத்தின் ஏற்பாட்டில், சிங்கப்பூரின் மிகப் பெரிய தமிழ் இலக்கிய தொகுப்பான தமிழ்ச் சோலையின் முதலாம் ஆண்டு நிறைவு விழா உட்லண்ட்ஸ் வட்டார நூலகத்தில் நேற்றைய தினம் இடம்பெற்றுள்ளது.
அதில் கலந்து கொண்ட போதே புரூக்ஸ்மா இவ்வாறு உரையாற்றியுள்ளார். அந்த நிகழ்வில் 100 ற்கும் மேற்பட்ட பார்வையாளர்கள் கலந்து கொண்டுள்ளனர்.
ஜப்பானிய அமெரிக்கரான தாமஸ், தமிழ்மொழியில் சரளமாகப் பேசியும் திருக்குறள் பற்றி உரையாற்றி பார்வையாளர்களை வியப்பில் ஆழ்த்தியுள்ளார்.
தமிழ்மொழியின் அழகை இளையவர்களிற்கு சுவாரசியமாக எடுத்துக் கூறினால் அவர்களின் மொழிப் பழக்கத்தை அதிகரிக்கலாம் எனவும் திருக்குறள் ஒவ்வொன்றும் நம் வாழ்க்கைக்குப் பொருந்தும் எனவும் பெருமையுடன் கூறியுள்ளார்.
தமிழ் இனத்தைச் சாரத ஒருவர் நம் மொழியை சிறப்பாகக் கற்றுப் பேசும் போது, தமிழராகப் பிறந்த நாம் தமிழில் பேச தயங்கக் கூடாது என்பதற்கு புரூக்ஸ்மா ஒரு சிறந்த எடுத்து காட்டு என மேலும் தெரிவிக்கப்பட்டுள்ளது